【我有嘢講】超新星登場:香港一樣有機會!

作者:SILVIA 發表日期:2017-04-06 01:02:06

正當18歲的你和妳,仍在為DSE埋頭苦讀日夜操卷,同是18歲的林樂勤(Jordan)上周六在港超聯賽一戰成名,揭開人生路上新章節。最爆新星蓄勢待發,豈想到躊躇滿志外闖學法,竟令自幼已是同儕尖子的「Jordan仔」,初嘗成長打擊:「原來有波踢唔係必然!」回流港超重新出發,看似向現實妥協,這位本土製造的超新星深信香港地,一樣可以踢出個未來!

工作證限制 貝利齋操冇得踢

香港球壇近年不乏新星湧現,但在首場職業賽面對「一哥」東方龍獅也毫不怯場,兩個淡定準繩的「巴利式」助攻技驚四座,難怪林樂勤會成為今期港超最Hot名字。「Jordan仔」笑言也有翻看>直播重溫,卻非為了回味讚美之詞:「主要係想聽番旁述前輩點評有乜地方可以改善。香港飛馬一班師兄賽後不斷提醒我,年輕球員最忌係踢得一、兩場好波就以為自己得咗,練波唔再畀心機,表現不進則退。我會記住自己仍然係飛馬陣中年紀最小,有冇得出場都要保持虛心。而家先係足球路開始,唔好再睇番場波,應該繼續向前望。」

6歲便隨父親好友山度士學踢波,10歲加入車路士足球學校(香港),「Jordan仔」年紀小小已橫掃各項青年與學界賽事的MVP獎項,又曾先後到訪中超球隊與巴西聖保羅青年軍跟操,成長路看似平步青雲,惟Jordan一再強調:「我都有挫敗過!」去年獲英甲球隊貝利簽下學徒合約,外闖夢啟航背後,卻是現實掙扎的開端。由於未能辦理工作證,「Jordan仔」與同行的門將謝家榮,只能「齋操冇得踢」:「英甲一星期有兩場青年聯賽,球隊喺比賽後多做較簡單嘅恢復訓練,好多時仲未夠喉就已練完,惟有同家榮一齊出去球場射波、健身。」

體會天外有天 「大把人好波過你」

貝利青年軍每日也有來自五湖四海的球員到來試腳,能留低的卻寥寥可數。Jordan與「家榮」是球隊陣中僅有的「外來人」,曾經在香港得天獨厚,人在異鄉卻由零開始。「因為冇得出場,有啲隊友好似睇你唔起,唔知你喺度做乜。有段時間我都好迷惘,但係唔想父母擔心,每次佢哋問起,我惟有話自己練得幾好。論技術,其實呢一年唔算進步咗好多,但係心態成長係最大得着,原來我真係好鍾意踢波。每日練波我都會記得喺英國冇波踢嘅日子,機會唔係必然,而且無論你喺香港有幾叻,呢個世界大把人好波過你。」稚氣未脫的笑容,多上歷練蛻變的謙遜。

回家開啟職業路,雖非當初所願,Jordan無悔決定:「每年英甲青年軍,只有拔尖幾個可以升到上一隊,升唔到就只有游走業餘聯賽等機會,唔少隊友已經開始搵定工。如果同英甲一隊比較,港超技術、節奏唔算爭好遠,較大分別可能係身體對抗強度,呢方面亦係自己缺點。青年軍同職業球隊始終係兩回事,點樣同隊友配合、埋門、閱讀球賽能力等等,我仲有好多地方需要學習,希望可以先喺香港表現到自己。」「仍需學習」,是Jordan重覆得最多的4個字。只有珍惜當下,才可走得更長更遠。


本文來源:http://hk.on.cc/hk/bkn/cnt/sport/20170406/bkn-20170406003053620-0406_00882_001.html




Tag:
本文鏈接:http://www.graduation-studio.com/5931.html