【港超專版】「健晃」「至孝」‧曾氏好兄弟

作者:Edith 發表日期:2017-10-07 03:30:02

社會上不少人隨意「稱兄道弟」,令真正的兄弟情顯得更可貴。本地球壇一對兄弟兵,效力東方龍獅的曾至孝及效力R&F富力的弟弟曾健晃,稱得上「情比金堅」,年齡差距未有為兩人形成隔膜,「阿孝」擔當弟弟最強後盾;而「阿晃」就成為哥哥的開心果,兩兄弟在足球路上互相扶持,有一種愛叫做「『曾』‧兄弟」!
圖/文:袁志浩(部分圖片由受訪者提供)

曾氏兄弟的足球路,由慈雲山邨配水庫遊樂場講起。兩人自小已在這充滿回憶的球場「拍住上」,並加入父親所創辦的球會,參加各種比賽,那時兩人只懂追求快樂,沒想過會效力同一支職業球隊。

難忘合作炮製入波

2011年兩兄弟在港菁「相遇」,一前一後的組合令「阿孝」成為弟弟最強後盾,「阿晃」說:「佢除咗傳授好多經驗畀我,我仲學習到佢堅持嘅態度。細個由返學到日常生活都由阿哥照顧,去到球場阿哥做後衞,令我好放心喺前場拎住個波闖關。」結果兩人在該季尾更合作炮製入球,回想這個難忘時刻,「阿晃」仍掛滿笑容:「我入完波擰轉身,策動攻勢嘅阿哥第一個衝過嚟抱起我,呢個入波係我最深刻一次。」

「能成為密友總帶着愛」,更何況是兩兄弟?這對「曾‧兄弟」笑言彼此「基情無限」,雖然弟弟去季加盟R&F富力,兩地相隔令「阿孝」坦言「生疏咗」,不過「阿晃」每星期返港1次,都會把握時間探哥哥,無論吹水、打機或玩寵物,都讓他倆再次拉近。「鐵漢柔情」的「阿孝」更透露被弟弟的正能量感染:「我哋有咩事都會保護同愛錫大家,依家呢個世界,兄弟都可能為利益出賣對方,但我哋唔會!佢有種陽光魅力去令身邊人開心,我見到佢做咩都開心,佢係我嘅開心果!」

情深說話鼓勵對方

同處球壇見證彼此成長,對方的處境他們比誰都清楚,多年深情說話終於說出口,「阿孝」先鼓勵弟弟:「細佬你要畀心機,盡情去享受足球。你嘅長處係射波,希望你有日得到肯定,喺球場上做鍾意做嘅嘢!」而「阿晃」就十分感性,引用內地電視劇的一句對白:「哥,你嘅汗水唔會白流,我相信有一日你嘅努力會獲尊重,『紅蓮即將綻放,雙星終會匯聚。命運的轉輪已經開始,請你耐心地等待』!」對話中足見兩人深厚感情,這對命中注定的「隊友」,在人生或足球路上都會繼續成好夥伴。

慈雲山成長地有讚冇彈

慈雲山是曾氏兄弟的成長地,他們見證這片地方20多年來的發展,街頭巷尾都瞭如指掌,但最重要的是兩人對這個小區充滿感情,「阿晃」就大讚慈雲山應有盡有,根本毋須「落山」:「呢度勝在多嘢食,又有3個足球場,加上喺山上空氣好,行街都舒服啲,我哋好多親戚都搬咗入嚟,依家做節都唔使周圍去。」

最愛人情味茶餐廳

不過數到最有人情味的,就是屋企樓下的一間茶餐廳,「阿孝」指:「我哋以前每次踢完波都會去呢度開餐,成班波友一齊食嘢最開心,雖然呢度豬扒同雞翼都好好味,但最正嘅都係嗰份感情,大家街坊見面會互相打招呼同問候,食開就唔會轉另一間。」當日訪問兩兄弟都揀選在這間茶餐廳內進行,難怪成為他們推介的好去處啦!


本文来源:http://hk.on.cc/hk/bkn/cnt/sport/20171007/bkn-20171007000547941-1007_00882_001.html




Tag:
本文鏈接:http://www.graduation-studio.com/29117.html