小姐你係……宮本光?

作者:Grace 發表日期:2018-07-18 01:14:26

《Summer Lesson︰宮本光》都出咗一排,各位巴打與光妹嘅好感度建立成點呢?可惜嘅係,呢隻Game,畀你玩到幾叻都好,當你除低個VR眼罩之後,光妹就會喺眼前消失……唔通我肯同唐三藏講個「愛」字,佢就會變個光妹出嚟畀我咩?救紫霞仙子先至搵唐三藏,搵實實在在光妹,靠「B記」啦!

Bandai Figuarts Zero宮本光(Hikari Miyamoto)終於上架,老老實實,論可玩性,比起同系嘅Hello Kitty,以至與光妹同期推出嘅鬆弛熊仲差,首先成隻Figure零關節,唔似得Hello Kitty、鬆弛熊個頭仲有得擰嚇,亦都冇換件Parts,換言之來來去去只得一個甫士,不過,喺雕工與塗裝上,理應掙番唔少印象分。首先,校服上嘅摺痕都雕得幾自然,唔會硬崩崩,尤其是白色上衣仲髹埋陰影,令摺痕更有層次感,至於校呔、衫袖、短裙上嘅條紋、圖案都髹得好準確,小編嗰盒就搵勻曬都冇髹出界,睇嚟B記今次喺QC上轉性了!其他細節位都值得畀Like,《English》作業封面印得似模似樣,右邊膝頭並冇漏到藥水膠布,細個芝麻都髹得清清楚楚,未有側側膊,仲要讚埋對鞋,雖然冇人預期會真皮製造,不過廠方喺塗裝上落足工夫,視覺上髹出皮革般嘅質感。

以上細節都交足貨有餘,造型比例又冇失準,照計身為光妹嘅鐵粉,冇理由唔入……ちょっとまって,等陣先,睇埋個樣,你可能要再三思!Bandai今時今日嘅3D Printing已經相當唔錯,SHF嘅Super Hero與星戰系列嘅頭雕亦都愈出愈似,不過今次嘅Figuarts ZERO 1/8宮本光,唔係話唔靚,由五官到頭髮逐處Check都冇問題,可惜夾埋一齊之後,總係覺得與Game中嘅人設有若干距離,有人話個樣成熟咗,唔似中學生,亦有人話直頭變咗兩個人;靚女還靚女,不過鐵粉要嘅係光妹,唔係第二個喎!到底似唔似,見仁見智,不過考慮到光妹嘅Figure商品應該唔多,鐵粉又忍唔忍到手?

其實要似,相信唔係冇,因為早喺去年嘅秋葉原,Tamashii Nation就展出過1/1嘅光妹,甫士與Figuarts ZERO 1/8一樣,高度當然唔只21cm,而係160cm(連埋地台有165cm),變到咁大,冇藉口再失手啩?當然入手程度都會高好多,售價高達2,700,000日圓,更大問題係有幾多人可以接佢返屋企,你估香港玩具迷個個都係古天樂,個個都係倉主咩!


本文來源:http://hk.on.cc/hk/bkn/cnt/lifestyle/20170906/bkn-20170906150058622-0906_00982_001.html




Tag:
本文鏈接:http://www.graduation-studio.com/25721.html