奧蘇里雲 點解係桌球程至美?

作者:Lisa 發表日期:2018-08-21 14:07:46

就算你唔睇波、以為曼聯會贏世界盃,但一定知道邊個係碧咸。即使冇留意桌球、大叫篤波悶到冇朋友嘅,亦都肯定聽過奧蘇里雲大名。火箭咁多Fans,係因為好波得嚟夠性格,寸得嚟仲要有Point;只要諗諗點解長氣噚氣懶正義嘅美國隊長,人氣永遠唔及口賤爽快寸寸貢嘅Iron Man,就知奧蘇點解咁紅。

奧蘇里雲桀驁不馴,桌球天賦無人能及,5分14秒打曬「滿分」147,呢種天才百年一遇。好多人話佢自負到過曬籠,但叻人往往唔鍾意解釋,又唔介意人哋點睇,所以先做成一堆誤會。計我話,有四個字最啱形容佢:妙手仁心。

波男唔係睇電視劇睇上腦。奧蘇一對妙手世間罕有,唔係點攞5次世界冠軍?而火箭一顆仁心,亦令佢有嗰句講嗰句挑戰權貴,炮轟世界桌總對職業桌球手嘅不公。火箭已41歲,講真已過職業生涯最高峰;佢敢講敢做,除咗自己谷到成肚氣外,更大原因係為同業爭取合理待遇,保住桌球手應有尊嚴。

打147,係每個桌球手嘅無上光榮,以往桌總亦隆重其事,派發14萬7千鎊獎金。但改制之後,變為每個排名賽只有5千鎊,雖然採累計制,今個排名賽冇人打到,下個就積到1萬鎊,但點計都同以前冇得比。桌總咁唔尊重,奧蘇就用行動,大巴大巴車落桌總塊面度。

啱啱世錦賽8強戰對丁俊暉,奧蘇於第20局明明有機會打147,但打到尾3隻紅波,佢蠱蠱惑惑咁笑一笑之後,就故意唔較黑波較Pink波,繼而輕輕鬆鬆完成清枱。奧蘇咁樣做,就係話你知我唔係做唔到,只不過係專登唔打。查實舊年威爾斯公開賽,佢已經試過特登打146。「篤波程至美」就係要重覆落你面,等桌總搵窿捐。

為做而做博出位,特登唔打滿分叫懶型:有態度有理念去捍衞尊嚴,就係勁到震堅到裂。《妙手仁心》重播過N次,到依家仲係大把人追,點解?因為真係好戲;奧蘇里雲呢個曠世天才,相信亦好快「播完」退休,大家有得睇就好睇喇,因為到未來,或者唔會再有一個咁完美、咁有Character、咁有話題性嘅球手出現,程至美呢個角色,都唔係咁易諗到,而又真係拍得出嚟又好睇啦!

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170429/bkn-20170429073029333-0429_00882_001.html




Tag:
本文鏈接:http://www.graduation-studio.com/13211.html