開箱男:Backpaix背囊 充電防丟好實用?

開箱男:Backpaix背囊充電防丟好實用?

唔少用家都着重背囊的機能,最好防水適合全天候使用,亦要間隔夠多!如果你都有以上要求,今集開箱的主角Backpaix相信就合你心水。Backpaix首次登場就是於集資網站Kickstarter,2016年中進行集資,最終獲得超過1,100名Backers支持,集資得超過24萬美元。咁多用家支持,Backpaix固然有其特點。外形方面,黑色長形設計坦白講驚喜不大,開箱男覺得比較平實。不過全袋都用上防水物料,亦用上防水拉鏈,用料相當足秤,但另一邊廂袋身亦重達3磅,真係有得有失。而且據廠方表示,袋身其實用上可循環再造CyclePET的膠樽所製成,每個袋等於40個PET樽,夠晒環保!

新袋最大特點當然就係袋面設有一個類近襟章的Smart Badge,用家需要將手機下載《BACKPAIX》App,再透過藍牙與Smart Badge連接。之後就可以於手機更換Smart Badge的顯示內容,包括不同的Emoiji、時間等。嫌以上功能太過玩Gimmick,用家亦可以啟動「Alarm」功能,當Smart Badge與手機距離太遠、藍牙斷開連接時,手機就會立即震動,而Smart Badge亦會隨即響起「嗶嗶」聲提示。開箱男試用,發現功能概念唔錯,不過Smart Badge與手機斷開藍牙連接後,並不會自動重新連接,要靠用家手動連接,嫌略麻煩,希望日後軟件更新後有所改善。順帶一提,用家亦可以選配一個單車遙控器,遙控器設有左右按鍵並可以安裝於單車手把上,按下左右時Smart Badge就會顯示轉向圖示,單車族相信啱用。

此外,BackPaix仲有另一個電子功能,袋內設有一個專門擺放外置充電器的間隔,同時備有兩條USB線,一條連接至Smart Bagde供電,另一條USB母頭則連接至袋身左下側小袋,方便大家為手機等Gadgets充電,設計的確方便。

作為背囊,載物量同樣重要,Backpaix就提供20L及30L兩個版本,間隔、功能更加多到你唔信,包括兩個水樽隔、袋面兩側間隔、蓋頂的小物隔、底部的波鞋隔、背部的防盜袋,而且底部設有兩條索帶可以綁緊腳架等長形物件。袋內亦可以擺放電腦及平板電腦,兼且可以從袋側直接開關拉鏈取放,就連袋面的金屬扣環亦可用作開瓶器。

總括而言,Backpaix無論用料、功能都相當不錯,加上背部軟墊、揹帶都非常厚實,開箱男揹起來都覺得好舒服。價錢方面,20L的定價接近二千元,用家亦可以選擇定價便宜大概四百元的無Smart Badge版本。


本文來源:http://hk.on.cc/hk/bkn/cnt/lifestyle/20170508/bkn-20170508112431008-0508_00982_001.html




Tag:
本文链接:http://www.graduation-studio.com/11521.html